நீங்கள் தேடியது "தொழில் அதிபர் கடத்தல்"

போரூர்:

பெங்களூரைச் சேர்ந்தவர் அருண்குமார். கார் வாங்கி விற்பனை செய்யும் தொழில் செய்து வருகிறார். இவரது மனைவி பத்மாவதி. இவர்கள் இருவரும் சென்னை விருகம்பாக்கம் சஞ்சய்காந்தி நகரில் உள்ள உறவினர் வீட்டுக்கு வந்திருந்தனர்.

இந்த நிலையில் வீட்டில் இருந்து வெளியே சென்ற அருண்குமார் திரும்பி வரவில்லை. இதுகுறித்து மனைவி பத்மாவதி விருகம்பாக்கம் போலீசில் புகார் அளித்தார்.

நானும் எனது கணவர் அருண்குமாரும் 2நாட்களுக்கு முன்பு விருகம்பாக்கத்தில் உள்ள உறவினர் வீட்டிற்கு வந்தோம். நேற்று மாலை கணவர் அருண்குமார் வெளியே சென்றார். இதுவரை வீடு திரும்பவில்லை.

இந்த நிலையில் கணவரின் நண்பரான சத்தியநாராயணா என்னை செல்போனில் தொடர்பு கொண்டு “உன் கணவர் எனக்கு 20 லட்சம் பணம் தரவேண்டும். அப்படி தரவில்லை என்றால் உன் கணவரை கொன்று விடுவேன் என்று மிரட்டல் விடுத்தார். எனவே எனது கணவரை மீட்டு தரவேண்டும்” என்று கூறியுள்ளார்.

இதுகுறித்து போலீசார் வழக்கு பதிவு செய்து விசாரணை நடத்தி வருகிறார்கள்.

காஞ்சீபுரம்:

காஞ்சீபுரத்தை அடுத்த ஓரிக்கை, திருவேங்கடம் நகரில் வசித்து வருபவர் பசூல் ரகுமான் (65). தொழில் அதிபர். இவர் காஞ்சீபுரம் மேட்டுத்தெரு, ராஜவீதி பகுதியில் சூப்பர் மார்க்கெட் நடத்தி வருகிறார்.

நேற்று இரவு 11 மணி அளவில் அவர் ராஜவீதியில் உள்ள சூப்பர்மார்க்கெட்டை மூடிவிட்டு மோட்டார் சைக்கிளில் தனியாக வீட்டுக்கு புறப்பட்டார்.

காஞ்சீபுரம் காந்தி ரோட்டில் வந்த போது பின்னால் வந்த ஆம்னி கார் திடீரென பசூல்ரகுமான் ஓட்டி வந்த மோட்டார் சைக்கிள் மீது மோதியது. இதில் நிலை தடுமாறிய அவர் மோட்டார் சைக்கிளோடு கீழே விழுந்தார்.

உடனே காரில் இருந்த 5 பேர் கும்பல் பசூல் ரகுமானுக்கு முதலுதவி செய்வது போல் பேச்சு கொடுத்தனர். திடீரென அவர்கள் பசூல் ரகுமானை கத்தி முனையில் மிரட்டி காரில் ஏற்றி கடத்தி சென்று விட்டனர்.

நள்ளிரவு நேரம் என்பதால் அப்பகுதியில் ஆட்கள் நடமாட்டம் இல்லை. இதனால் கடத்தல் குறித்து உடனடியாக வெளியே தெரியவில்லை.

இதற்கிடையே பசூல் ரகுமானின் மகன் ஜயாலுதீனின் செல்போன் எண்ணுக்கு கடத்தல் கும்பல் போன் செய்தனர். அப்போது அவரிடம், “உங்கள் தந்தை பசூல் ரகுமானை கடத்தி உள்ளோம். அவரை விடுவிக்க ரூ.50 லட்சம் கொடுக்க வேண்டும்” என்று தெரிவித்தனர்.

இதனை கேட்டு அதிர்ச்சி அடைந்த அவர், தந்தை கடத்தல் குறித்து மாவட்ட போலீஸ் சூப்பிரண்டு சந்தோஷ் ஹதிமானிக்கு தகவல் தெரிவித்தார். டி.ஐ.ஜி. தேன்மொழி உத்தரவுப்படி கடத்தல் கும்பலை பிடிக்க 3 தனிப்படை அமைக்கப்பட்டது.

மேலும் கடத்தல்காரர்கள் தப்பிச் செல்வதை தடுக்க காஞ்சீபுரம், திருவண்ணாமலை, வேலூர் ஆகிய 3 மாவட்ட போலீசார் உஷார்படுத்தப்பட்டனர். அவர்கள் தீவிர வாகன சோதனையில் ஈடுபட்டு வந்தனர். இச்சம்பவத்தால் காஞ்சீபுரத்தில் பெரும் பரபரப்பு ஏற்பட்டது.

இந்த நிலையில் ஜயாலுதினின் செல்போனுக்கு மீண்டும் தொடர்பு கொண்ட கடத்தல் கும்பல் பணம் குறித்து கேட்டனர். இதனை பதிவு செய்த போலீசார் கடத்தல் கும்பலின் இருப்பிடம் குறித்து ஆய்வு செய்தனர்.

அவர்கள் காஞ்சீபுரத்தை அடுத்த தூசி அருகே மாமண்டூர் பகுதியில் சென்று கொண்டு இருப்பது தெரிந்தது.

இதையடுத்து தனிப்படை போலீசார் அங்கு விரைந்து சென்றனர். இதனை அறிந்து கடத்தல் கும்பல் அதிகாலை 3 மணி அளவில் மாமண்டூர் வயல்வெளி பகுதியில் பசூல் ரகுமானை இறக்கி விட்டு தப்பி சென்று விட்டனர்.

நிம்மதி அடைந்த பசூல் ரகுமான் அங்கு வசிப்பவர்களிடம் செல்போன் வாங்கி கடத்தல் கும்பல் விட்டு சென்றது குறித்து மகன் ஜயாலுதீனுக்கும், உறவினர்களுக்கும் தெரிவித்தார்.

போலீசார் விரைந்து சென்று பசூல் ரகுமானை மீட்டனர். அவரிடம் கடத்தல் கும்பல் குறித்து விசாரணை நடத்தி வருகிறார்கள். அவர்களை பிடிக்க போலீசார் தீவிர நடவடிககை எடுத்து வருகின்றனர். #kidnapping

மேலூர்:

மதுரை மாவட்டம் மேலூர் அருகே உள்ள அரிட்டாபட்டியில் ‘‘சூப்பர் மேக்’’ என்ற பெயரில் ரப்பர் தொழிற்சாலை இயங்கி வருகிறது. கேரள மாநிலம் இடுக்கி மாவட்டம் பைசல் வாரா பகுதியைச் சேர்ந்த ஜோசப் மேத்யூ (வயது60) இதனை நடத்தி வருகிறார்.

இவருக்கு கேரளாவில் டீ எஸ்டேட் உள்பட பல்வேறு தொழில்கள் உள்ளன. தொழிலதிபரான இவர், அடிக்கடி மதுரைக்கு வந்து ரப்பர் தொழிற்சாலையை பார்வையிட்டு செல்வது வழக்கம்.

இன்று காலை ஜோசப் மேத்யூ, தனது உதவியாளர் மத்தாய் என்பவருடன் காரில் மதுரை புறப்பட்டார். டிரைவர் ஷியாம் காரை ஓட்டி வந்தார். காலை 8.30 மணியளவில் மேலூர் 4 வழிச்சாலையில் நரசிங் கம்பட்டி பிரிவில் இருந்து அரிட்டாபட்டிக்கு செல்லும் பாதையில் கார் சென்று கொண்டிருந்தது. அப்போது 2 கார்கள் வேகமாக வந்தன. அந்த கார்கள் ஜோசப் மேத்யூ வந்த காரை வழிமறித்து நின்றன.

2 கார்களில் இருந்தும் திபு...திபுவென இறங்கிய சுமார் 9 பேர் கொண்ட கும்பல் ஜோசப் மேத்யூ வந்த கார் டிரைவர் ஷியாமை வெளியே இழுத்து சரமாரி தாக்கியது. அவரது அலறல் சத்தம் கேட்டு அக்கம் பக்கத்தினர் அங்கு திரண்டனர். அதற்குள் அந்த கும்பலில் சிலர் ஷியாமை கீழே தள்ளிவிட்டு தொழில் அதிபர் ஜோசப் மேத்யூ, அவரது உதவியாளர் மத்தாய் ஆகியோரை காருடன் மின்னல் வேகத்தில் கடத்திச் சென்றது.

கடத்தல் கும்பலைச் சேர்ந்தவர்கள் தாங்கள் வந்த கார்களை எடுத்துக் கொண்டு தப்ப முயன்ற போது பொதுமக்கள் ஒரு காரை மடக்கினர். அதில் டிரைவர் மட்டுமே இருந்தான். அவனை பிடித்த பொதுமக்கள், மேலூர் போலீசாருக்கு தகவல் கொடுத்தனர்.

இன்ஸ்பெக்டர் (பொறுப்பு) கலைக்கதிரவன் மற்றும் போலீசார் சம்பவ இடம் விரைந்து வந்தனர். காருடன் பிடிபட்ட வாலிபரை பிடித்து விசாரித்தனர். இதில் அவனது பெயர் கார்த்திக், மதுரை வில்லாபுரத்தைச் சேர்ந்தவன் என தெரியவந்தது.

தொழில் அதிபர் காருடன் கடத்தப்பட்ட தகவல், சோதனை சாவடி மற்றும் போலீஸ் நிலையங்களுக்கு தெரிவிக்கப்பட்டது. மாவட்ட போலீஸ் சூப்பிரண்டு மணிவண்ணன் உத்தரவின் பேரில், போலீசார் உஷார் படுத்தப்பட்டு, மாவட்டம் முழுவதும் தேடுதல் வேட்டை தீவிரப்படுத்தப்பட்டு உள்ளது. தனிப்படை அமைக்கப்பட்டும் தொழில் அதிபர்மற்றும் அவரது உதவியாளரை தேடும் பணி நடைபெற்று வருகிறது. தொழில் போட்டியில் ஜோசப் மேத்யூ கடத்தப்பட்டரா? அல்லது வேறு எதுவும் காரணமா? என்பது குறித்து பல்வேறு கோணங்களில் போலீசார் விசாரணை நடத்தி வருகின்றனர்.

காருடன் சிக்கிய கடத்தல் கும்பலைச் சேர்ந்த கார்த்திக்கிடமும் போலீசார் தீவிர விசாரணை நடத்தி வருகின்றனர். பட்டப்பகலில் தொழில் அதிபர் காருடன் கடத்தப்பட்ட சம்பவம், மதுரை மாவட்டத்தில் பரபரப்பை ஏற்படுத்தி உள்ளது.

மதுராந்தகம்:

மதுராந்தகத்தை அடுத்த சோத்துப்பாக்கத்தைச் சேர்ந்தவர் முத்துகுமார்.

இவர் மதுராந்தகம் அருகே சென்னை-திருச்சி தேசிய நெடுஞ்சாலையில் உள்ள பாக்கம் என்ற இடத்தில் அரவிந்த் செராமிக்ஸ் என்ற டைல்ஸ் கடை நடத்தி வருகிறார்.

நேற்று கடைக்கு சென்ற அவர் இரவு நீண்ட நேரமாகியும் வீடு திரும்பவில்லை. இதனால் உறவினர்கள் அவர் செல்போனுக்கு தொடர்பு கொண்டனர். ஆனால் அது சுவிட்ச் ஆப் செய்யப்பட்டு இருந்தது.

இதையடுத்து கடைக்கு உறவினர்கள் மற்றும் நண்பர்கள் சென்றனர். அப்பகுதியைச் சேர்ந்த சிலரிடம் கேட்டபோது, “முத்துக்குமார் கடையை பூட்டிவிட்டு காரில் ஏறும்போது 5 பேர் கொண்ட கும்பல் அவரை வழிமறித்து காருடன் கடத்தி சென்றதாக” தெரிவித்தனர்.

இதனால் அதிர்ச்சி அடைந்த உறவினர்கள் மதுராந்தகம் போலீசில் புகார் செய்தனர். உடனே போலீசார் மாவட்டம் முழுவதும் தீவிர வாகன சோதனையில் ஈடுபட்டனர்.

அனைத்து சாலைகளிலும் தற்காலிக சோதனைச் சாவடி அமைத்து விசாரணை நடத்தினர். முத்துக்குமாரின் செல்போன் சிக்னலை வைத்து அவர் எந்த பகுதியில் இருக்கிறார் என்பதை கண்டுபிடிக்கும் முயற்சியில் போலீசார் ஈடுபட்டுள்ளனர்.

இதுகுறித்து வழக்குப் பதிவு செய்துள்ள போலீசார் தொழில் அதிபர் முத்துக்குமாரை பணம் கேட்டு மிரட்டுவதற்காக மர்ம கும்பல் கடத்தி சென்றதா? அல்லது தொழில் போட்டியில் கடத்தப்பட்டாரா? என்று விசாரித்து வருகிறார்கள்.

மேலும் அவருக்கு யாராவது விரோதிகள் இருக்கிறார்களா? என்று உறவினர்களிடம் விசாரணை நடத்தப்படுகிறது. #Tamilnews

பண்ருட்டி:

பண்ருட்டி தொழில் அதிபர் விஜயரங்கனை நேற்று முன்தினம் மர்ம மனிதர்கள் தாக்கி காரில் கடத்தி சென்றனர். இது குறித்த தகவல் கிடைத்ததும் மாவட்ட போலீஸ் சூப்பிரண்டு விஜயகுமார், பண்ருட்டி துணை போலீஸ் சூப்பிரண்டு சுந்தரவடிவேல் மற்றும் போலீசார் தீவிர விசாரணை நடத்தினர்.

மேலும் கடத்தப்பட்ட விஜயரங்கனை பிடிக்க 7 தனிப்படை அமைக்கப்பட்டது. மாவட்டம் முழுவதும் போலீசார் உஷார் படுத்தப்பட்டனர். கடத்தல்காரர்களை போலீசார் தேடிவந்தனர். இந்த நிலையில் நேற்று விஜயரங்கன் வீடு திரும்பினார்.

போலீசார் நடத்திய விசாரணையில் தொழில் அதிபரை கடத்தியது கூலிப்படையை சேர்ந்தவர்கள் என்று தெரியவந்தது.

விஜயரங்கனுக்கு, புதுவையை சேர்ந்த சிலருடன் தொழில் ரீதியாக பணம் கொடுக்கல்-வாங்கல் இருந்து வந்துள்ளது. இதில் பிரச்சினை ஏற்பட்டு புதுவையை சேர்ந்த கூலிப்படையினர் விஜயரங்கனை கடத்தி இருக்கலாம் என்று போலீசார் கருதுகிறார்கள்.

இதைத்தொடர்ந்து புதுவை மற்றும் கடலூர், நெய்வேலி, சிதம்பரம் போன்ற பகுதிகளில் தனிப்படை போலீசார் முகாமிட்டு கூலிப்படையினரை வலைவீசி தேடிவருகிறார்கள்.

கூலிப்படையினர் பிடிபட்டால்தான் விஜயரங்கன் கடத்தப்பட்டது ஏன்? என்பதற்கான முழு விவரங்களும் தெரியவரும்.

பண்ருட்டி:

கடலூர் மாவட்டம் பண்ருட்டி காமராஜர் நகரை சேர்ந்தவர் விஜயரங்கன் (வயது 46). பிரபல தொழில் அதிபர். காங்கிரஸ் பிரமுகர் ஆவார். இவரது மனைவி அபிராமி. இவர்களுக்கு 2 மகன்கள் உள்ளனர். விஜயரங்கன் வட்டிக்கு பணம் கொடுக்கும் தொழில் செய்து வருகிறார்.

மேலும் அவர் பண்ருட்டி-கும்பகோணம் சாலையில் கட்டுமான பொருட்கள் விற்பனை செய்யும் கடையும் நடத்தி வருகிறார்.

நேற்று இரவு 9 மணிக்கு கடையை பூட்டி விட்டு விஜயரங்கன் மோட்டார் சைக்கிளில் வீட்டுக்கு சென்றார். காமராஜர் நகரில் வடகைலாசம் கூட்டுறவு சங்கம் அருகே சென்ற போது பின்னால் 2 வாலிபர்கள் மோட்டார் சைக்கிளில் வந்தனர். அவர்கள் திடீரென்று விஜயரங்கனின் மோட்டார் சைக்கிள் மீது மோதினர். இதில் நிலைதடுமாறி விஜயரங்கன் கீழே விழுந்தார்.

அப்போது அந்த வழியாக கார் ஒன்று வேகமாக வந்தது. அதில் இருந்து 6 பேர் கீழே இறங்கினர். சாலையில் விழுந்து கிடந்த விஜயரங்கனை சரமாரியாக தாக்கி குண்டுக்கட்டாக தூக்கி காரில் கடத்தி சென்றனர்.

அப்போது மோட்டார் சைக்கிளில் வந்த வாலிபர்களில் ஒருவர் விஜயரங்கனின் மோட்டார் சைக்கிளையும் எடுத்து சென்று விட்டார்.

தொழில் அதிபர் விஜயரங்கன் கடத்தப்பட்ட சம்பவம் அவரது அண்ணன் விஜயராகவனுக்கு தெரியவந்தது. உடனே அவர் இது குறித்து பண்ருட்டி போலீசில் புகார் செய்தார்.

தொழில் அதிபர் கடத்தப்பட்ட தகவல் அறிந்ததும் மாவட்ட போலீஸ் சூப்பிரண்டு விஜயகுமார், பண்ருட்டி துணை போலீஸ் சூப்பிரண்டு சுந்தரவடிவேல் ஆகியோர் சம்பவ இடத்துக்கு நேரில் சென்று விசாரணை நடத்தினர்.

மேலும் விஜயரங்கனின் வீட்டுக்கு சென்று அவரது மனைவியிடமும் விசாரணை மேற்கொண்டனர்.

விஜயரங்கன் அந்த பகுதியில் பலருக்கு வட்டிக்கு பணம் அதிகளவு கொடுத்துள்ளார். தொழில் போட்டி காரணமாகவோ அல்லது அவரிடம் இருந்த பணத்தை பறிக்கவோ அவரை மர்ம மனிதர்கள் கடத்தி சென்றிருக்கலாம் என்று போலீசார் சந்தேகிக்கிறார்கள்.

மேலும் அவரை கடத்தியது கூலிப்படையை சேர்ந்தவர்களாக இருக்கலாம் என்றும் போலீசார் கருதுகிறார்கள்.

இந்த சம்பவம் தொடர்பாக மாவட்டம் முழுவதும் போலீசார் உஷார்படுத்தப்பட்டனர். விடிய விடிய போலீசார் வாகன சோதனை மேற் கொண்டனர்.

மேலும் சந்தேகப்படும் படியான வாகனங்களை நிறுத்தி சோதனை செய்தனர். தொழில் அதிபர் விஜயரங்கன் நேற்று காலை முதல் யாரிடமெல்லாம் செல்போனில் பேசியுள்ளார் என்ற தகவல்களையும் போலீசார் சேகரித்தனர். செல்போன் டவர் மூலம் ஆய்வு மேற் கொண்டுள்ளனர். சம்பவம் நடந்த இடத்தில் உள்ள கண்காணிப்பு கேமிராவில் பதிவான காட்சிகளையும் ஆய்வு செய்தனர்.

தொழில் அதிபரை கடத்தி சென்றவர்களை பிடிக்க போலீஸ் சூப்பிரண்டு விஜயகுமார் 3 தனிப்படை அமைத்துள்ளார். இதில் புதுப்பேட்டை இன்ஸ் பெக்டர் முருகேசன், காடாம் புலியூர் இன்ஸ்பெக்டர் குமரய்யா, நெல்லிக்குப்பம் இன்ஸ்பெக்டர் ரவிச்சந் திரன் ஆகியோர் இடம் பெற்றுள்ளனர்.

தொழில் அதிபரை கடத்தி சென்றவர்கள் புதுவையில் பதுங்கி இருக்கலாம் என்று போலீசார் கருதுகிறார்கள். இதைத் தொடர்ந்து தனிப்படை போலீசார் இன்று அதி காலை புதுவைக்கு சென்று அங்குள்ள லாட்ஜூகளில் அதிரடி சோதனையில் ஈடுபட்டு வருகின்றனர்.

பண்ருட்டியில் தொழில் அதிபர் கடத்தப்பட்ட சம்பவம் அந்த பகுதியில் பெரும் பரபரப்பை ஏற்படுத்தியுள்ளது.